Għaliex ktibt il-blogg?

Fil-bidu tal-kampanja elettorali issuġġerewli li naqsam magħkom, permezz ta’ blogg, xi ħsibijiet u esperjenzi li ngħaddi minnhom matul il-kampanja elettorali. Għall-bidu kont ftit xettika għall-żewġ raġunijiet, waħda għax ma kontx naf jekk jirnexxiliex insib il-ħin li nikteb xi ħaġa kuljum, u l-oħra, minħabba r-responsabiltà ta’ meta wieħed jikteb għall-pubbliku. Iddeċidejt li nidħol għall-isfida.

Id-deċiżjoni li nżomm blogg għenitni nsegwi aktar mill-qrib x’kien għaddej madwari u kabbart l-informazzjoni li kelli. Barra minn hekk, xtaqt li permezz tal-blogg inwassal xi messaġġi li nispera li jħallu xi ftit tal-ġid. Jiena rċevejt ħafna f’ħajti min għand ħaddieħor u allura, xtaqt naqsam dak li rċevejt magħkom ukoll.

Il-ħajja fiha l-iebes tagħha. Sfortunatament, xi drabi niltaqa’ ma' nies li jibqgħu dejjem mdejqin minħabba esperjenzi negattivi li jkollhom f’ħajjithom. Niltaqa’ wkoll m’oħrajn li għaliex ma jirnexxilhomx jakkwistaw dak li jixtiequ, jagħlqu għajnejhom għal affarijiet sbieħ li diġà għandhom… bħal meta xi ħadd iżomm it-twieqi dejjem magħluqin u ma jarax is-sema u x-xemx ta’ barra. Għandna nitħabtu u naħdmu għal dak li nixtiequ iżda dak li ma jirnexxilniex nakkwistaw, m’għandux innessina dak li diġà għandna.

Ejjew infittxu min jgħina ħalli ma neħlu f'ebda esperjenza negattiva. Bl-appoġġ f’waqtu, l-esperjenzi ibsin u koroh jinbidlu minflok, f’għarfien u ħiliet pożittivi.

Ejjew inkunu ta’ spalla għal xulxin biex nikbru permezz tal-esperjenzi ta’ ħajjitna u naraw is-sabiħ ta’ madwarna. Ejjew nerġgħu insaħħu r-relazzjonijiet tagħna mill-ġdid kuljum u b’hekk id-differenzi ta’ bejnietna nibdluhom f’għaqda b’diversità fl-ideat u t-twemmin. B’hekk l-isfidi jinbidlu f’opportunitajiet.

Meta ninfetħu għal ħaddieħor ikollna rikkezzi li ma jispiċċaw qatt!

Nixtieq nieħu l-opportunità biex nirringrazzja lil dawk kollha li jgħinuni u jagħtuni l-appoġġ tagħhom kontinwament.

Nawguralkom saħħa u ġid!

Tislijiet

Kate :)

L-Għażla f’idejna.

Il-lum f’nofs il-lejl jieqfu l-meetings u d-dibattiti fil-pubbliku, sabiex għada l-Ġimgħa, fil-kwiet nirriflettu fuq dak li smajna matul il-kampanja elettorali.

F’dawn l-aħħar ħames snin, saru ħafna proġetti, u investiment qawwi fl-oqsma tas-saħħa, edukazzjoni, ambjent u xogħol. Daħlet il-munita Ewro, ċertifikat li l-finanzi qegħdin fis-sod. Matul din il-kampanja ingħata tagħrif dwar il-kisbiet kbar li saru dawn l-aħħar snin fuq www.maltarightnow.com u www.lawrencegonzi.info .

Iż-żewġ partiti l-kbar ippreżentawlna l-programmi elettorali tagħhom.

Il-Partit Nazzjonalista jrid ikompli jibni fuq dak li bena tul din il-leġislatura u hekk, jassigura aktar ġid li jgawdi minnu kulħadd. Għandu viżjoni ta’ fejn irid jasal il-pajjiż sal-2015. Jemmen fil-hiliet u l-abilitajiet tagħna l-Maltin. Jemmen fil-potenzjal ta’ l-individwu u ta’ pajjizna. Jemmen li flimkien ‘kollox possibli’.

Il-Partit Laburista jiprometti bidu ġdid, ma jridx ifakkar x’kienu r-riżultati tas-sentejn li fihom iggverna meta, fost l-oħrajn ma qablix mas-shubija ta’ Malta fl-Unjoni Ewropea. Joffri manifest elettorali bi kliem generali li jħalli ħafna lok għal interpretazzjoni. Jagħti l-impressjoni li ‘jekk inkunu fil-Gvern, imbghad naraw’.

Imma mhux il-kliem joghod, il-fatti! Id-differenza bejn iż-żewġ partiti hi ċara daqs il-kristall! X’inhi l-ghazla taghna?

Inti ser tmur tivvota, jew ser thalli lil ħaddiehor jivvota u jagħżel minflokok għax ma jimpurtakx?

Nifhmu li jekk ma nivvutawx, inkunu qed ngħinu partit ieħor biex jiggverna?

Nirrealizzaw li l-vot hu għodda f’idejna biex nagħżlu lil min ser immexxina min nhar it-Tnejn ’l quddiem, għall-ħames snin li ġejjin?

Iddeċidejna liema partit hu l-iżjed kapaċi jgħina niffaċċjaw l-isfidi ta’ kuljum biex ngħixu ħajja ta’ kwalità fil-familja, fl-istudju, fix-xogħol, fir-rikreazzjoni u fl-irtirar?

X’jaqblilna nagħżlu, lil min jemmen fil-ħiliet tagħna jew lil min jaqtalna qalbna għax m’għandux fiduċja fina?

Nafu li jekk l-ekonomija ma tkunx soda, ikun diffiċli nsostnu s-servizzi tas-saħħa, l-għajnuniet soċjali u edukazzjoni progressiva?

Nifhmu li il-ġid komuni hu ġid għalina, għall-familja, għall-Maltin u għall-umanità?

Nawgura għażla ta’ ġid
Tislijiet

Kate :)

Residenza Fil-Komunita`

Din il-ġimgħa żorna dar ġdida tal-Aġenzija Sapport f’Bormla. Id-dar jisimha ‘Andrew’ b’unur għal wieħed mir-residenti tas-Sapport li minn ftit ġimgħat ‘l hawn m’ghadux maghna.

Dan l-isem fih innifsu jixhed id-dedikazzjoni ta’ l-Aġenzija Sapport għax-xogħol li tagħmel fil-komunità ma’ persuni li għandhom bżonn is-servizz tagħha.

Sa ftit snin ilu, persuni b’diżabilità kienu jiddependu għal kollox mill-ġenituri tagħhom sakemm dawn kienu għadhom ħajjin. Ħafna ġenituri, b’riżultat ta’ l-imħabba kbira lejn uliedhom b’diżabilità kienu jiproteġuhom u jżommuhom lura. Meta l-genituri kienu jiġu nieqsa jew ma jkunux jistgħu jieħdu aktar ħsieb ta’ l-ulied b’diżabilita`, ħafna drabi l-ulied kienu jispiċċaw f’djar għall-anzjani anki jekk ikun għadhom ta’ età żgħira.

L-Aġenzija Sapport twaqqfet fl-2001 biex tgħin lill-persuni b’diżabilità biex jgħixu u jipparteċipaw fil-kommunità, filwaqt li tagħti appoġġ lill-familji tagħhom. Dan tagħmlu permezz ta’ diversi servizzi, fosthom dak ta’ l-assistenti personali li jgħinu lill-persuni b’diżabilità jibqgħu jgħixu mall-familja, fid-djar tagħhom stess. B’hekk, genituri anzjani jew genituri li jkollhom impjieg barra mid-dar ikunu jistghu jserrhu mohhom li uliedhom b’dizabilita` qed jircievu l-ghajnuna mehtiega mill-assistenti personali taghhom.

Filwaqt, li l-Aġenzija Sapport temmen li l-aħjar post għal persuni kollha huwa id-dar mal-familja tagħhom, dan mhux dejjem ikun possibli. Ir-residenzi fil-kommunità huma l-eqreb alternattiva għad-dar tal-familja. Dawn id-djar u appartamenti żgħar li jieħdu minn erbgħa sa’ seba’ min-nies jitmexxew mir-residenti stess bl-għajnuna tal-assistenti tagħhom. Fil-proċess, ir-residenti jitgħallmu jagħmlu l-affarijiet bażiċi bħal imorru jixtru, jirkbu karozza tal-linja, u uħud minnhom anki imorri għax-xogħol.

L-Aġenzija Sapport tagħti appoġġ lill-familji tal-persuni b’diżabilità u toħloq familji ġodda għal-dawk il-persuni b’diżabilità li għal raġuni jew oħra ma jistgħux jgħixu fil-familji tagħhom. B’hekk, persuni b’diżabilità jkollhom id-dinjità tagħhom imħarsa, u l-ġenituri jkollhom moħħom mistrieħ bis-servizzi tal-Aġenzija Sapport.

Tislijiet

Kate :)

Servizz bi Tbissima

Servizz bi tbissima….rekwiżit essenzjali fil-qasam tat-Turiżmu. It-turist iħallas għas-servizz li jirċevi u għalhekk jistenna li jingħata pakkett ta’ kwalità li jħallilu memorji pjaċevoli tas-safra tiegħu. Turist sodisfatt jaf jerga’ jiġi u anke jirriklama pajjiżna b’mod pożittiv lil ħbieb u familjari tiegħu.

Is-suċċess ta’ l-industrija tat-turiżmu jiddependi minn ċerti fatturi li mhux dejjem ikollna kontrol fuqhom. Bla dubju pero`, jekk kullħadd jagħti sehmu, jirnexxilna negħlbu ħafna sfidi, fosthom il-kompetizzjoni. Kulħadd hu responsabbli għal dan is-success f’Malta u Għawdex – il-Gvern, l-Awtorità tat-Turiżmu, ħaddiema fil-portijiet ta’ l-ajru u l-baħar, xufiera tat-taxis, coaches, karozzi tal-linja u karozzini, propretarji ta’ lukandi, flats u restoranti, sidien ta’ ħwienet, gwidi…. kull ċittadin.

Is-sena 2007 ġiet deskritta min Francesco Frangialli, segretarju ġenerali tal-Organizzazzjoni Dinjija tat-Turiżmu bħala “sena brillanti” għall-industrija tat-turiżmu f’Malta. Anke l-Eurostat ikkonfermat li fit-2007 iż-żieda fir-rata tat-tkabbir f’Malta hi l-għola waħda fl-Unjoni Ewropea.

Dan it-tkattir nistgħu nattribwuħ għall-finanzi kbar investiti mit-taxxi tagħna u mill-fondi ta’ l-Unjoni Ewropea; għall-kontribut ta’ l-Awtorità tat-Turiżmu li qed timplimenta il-Pjan ta’ Strategija biex tkabbar is-suq u l-kompetitività li jinkludi fost oħrajn il-ħolqien tal- portal Visit Malta.com li ġibet miljun u nofs viżitatur u il-low cost carriers; għall-ħidma tal-għaqdiet non governattivi; għall-kalendarju ta’ attivitajiet kulturali, sportivi u mużikali u għar-riklam tal-wirt storiku, baħar u natura, flimkien mal-karatteristiċi uniċi fil-gżejjer tagħna.

Ħafna minna l-Maltin niddipendu fuq it-turisti għall-għixien tagħna. Ejjew nibżgħu għat-turiżmu f’Malta għax hu settur fraġli. Ejjew nagħmlu ħilitna biex ngħollu l-livell tal-prodott Malti u nagħtu servizz bi tbissima ….”Welcome to Malta and Gozo.”

Tislijiet

Kate :)

Monument għat-Tfal Maltin Emigranti

Meta s-sajf li għadda tlajt ma’ Lawrence l-Awstralja biex niltaqgħu mal-komunità Maltija t’hemmhekk, waħda miċ-ċeremonji li l-iżjed ħallitni kommossa kienet dik li saret f’Freemantle Port, ’l barra minn Perth, ħdejn monument iddedikat lit-300 tifel u tifla Maltin, li ta’ età żgħira ħallew lill-familji naturali tagħhom warajhom biex isibu futur ġdid ġo l-Awstralja.

Fil-port ta’ Freemantle fejn kien jittrakka dak iż-żminijiet il-vapur mal-wasla tiegħu fl-Awstralja, il-monument b’tifel u tifla żgħar bil-bagalja tas-safar f’idejhom, hu impressjonanti ħafna. Wieħed jempatizza l-effetti negattivi tat-trauma psikoloġika fuq dawn it-tfal il-bogħod minn familthom u x-xtut Maltin.

Il-bieraħ fl-għaxija wara l-meeting kont preżenti għal ċerimonja oħra b’dedikazzjoni ta’ monument ġdid għal dawn l-istess tfal emigranti. Din id-darba konna Pinto Wharf, (illum magħruf bħala VISET) fil-port tal-Belt Valletta, minn fejn kien jitlaq il-vapur bl-.istess tfal emigranti. Dan il-monument f’forma ta’ vapur tal-karti huwa biċċa arti verament sabiħa li tirrapreżenta is-sempliċità, il-fraġilità u l-vulnerabilità tat-tfal.

X’differenza llum! Kemm inbidlu ċ-ċirkostanzi! Għal Grazzja t’Alla, l-maġġoranza tal-familji Maltin jistgħu jsibu l-għixien tagħhom f’din id-daqsxejn ta’ gżira żgħira tagħna!

Kemm sar hawn opportunitajiet għat-tfal tagħna! …skejjel sbieħ, edukazzjoni ħolistika u inklussiva; faċilitajiet sportivi, rikreattivi, kulturali u terawpetiċi; aċċessibilità għat-teknoloġija; kura tas-saħħa!

Riċentiment, il-Kummissarju tat-Tfal nehdiet Manifest għat-Tfal b’rakomandazzjonijiet li jkopru diversi oqsma fosthom is-saħħa, l-edukazzjoni u l-ambjent. Il-kummissarju tisħaq li għandna ninvestu fit-tfal tagħna għax is-soċjetà taħsad fil-futur dak li niżirgħu illum fit-tfal tagħna.

Dan il-monument sar f’impenn biex tingħalaq storja ta’ weġgħat li esperjenzaw it-tfal Maltin 50 sena ilu ’l bogħod minn xtuthom f’Malta. Illum fostna għandna tfal li telqu minn pajjiżhom minħabba faqar, ġlied u inġustizzji oħra biex ifittxu futur aħjar f’pajjiżna.
Ejjew nitgħallmu minn żbalji li saru fil-passat minkejja intenzjonijiet tajbin, u naraw li ssir ġustizzja mat-tfal, fil-pajjiżi kollha, imma speċjalment f’pajjiżna stesss.

Tislijiet

Kate :)

Impressjonanti …. u pjaċevoli

Dalgħodu bdejna aktar kmieni mis-soltu, imma ma ddispjaċini xejn, għaliex bdejna il-ġurnata b’żewġ postijiet tassew interessanti u pjaċevoli.

Ftit ’l barra mir-Rabat iltqajna ma’ familja fir-razzett tagħhom fejn irabbu l-baqar għall-ħalib u għal-laħam tagħhom. Immeraviljawni fuq kollox l-indafa fil-post u l-proċess li biħ jinħalbu l-baqar u jiġi preżervat il-ħalib. M’għandhom x’jaqsmu xejn ma dak kollu li jgħaddi minn moħħ ħafna minna meta nirreferu għal razett.

Il-familja li żorna għarfet tieħu dawk l-opportunitajiet ta’ fondi li toffri l-Unjoni Ewropea, biex immodernizzaw l-ażjenda tagħhom, u anki irċevew taħriġ barra minn Malta.

L-investimeni li sar fil-makkinarju li biħ jinġabar il-ħalib iffisser li illum il-baqar jinħelbu permezz tal-magni, u l-ħalib jgħaddi minn sistema ta’ pajpijiet biex jiġi ppasturizzat u jibqa’ sejjer dritt fil-bowser li jwasslu biex jiġi ppakkjat fil-kartun għall-konsumatur. Dan il-proċess, li jsir b’ makkinarju ta’ l-għola livelli, jelimina kull possibilità li l-ħalib jiġi kkontaminat.

U xi ngħidu għall-indafa! Il-post jiġi mnaddaf bil-magni regolarment, u l-livell tal-indafa huwa għoli ħafna. Lanqas tinduna li tkun qiegħed f’razzett.

Pero, fuq kollox, laqtuni ir-rispett u l-imħabba li din il-familja għandhom għall-annimali li jrabbu. Tassew li din iż-żjara kienet esperjenza impressjonanti.

Min hemmhekk inżilna is-Salini u Kennedy Grove. Biċċa kemmxejn differenti mill-pajsaġġ tagħna – bosk, art bassasa (marshland) u salini tal-melh li kollha jagħmlu parti min pjan ta’ riabilitazzjoni, li nbdiet l-ewwel parti tiegħu.

Kennedy Grove minn dejjem kienet poparli ħafna mal-familji ta’ l-inħawi li jħobbu jgawdu l-kampanja. Issa sar tisbieħ ġeneral: inżera it-turf, ġiet installata funtana fl-art li tista’ timxi minn fuqha u taraġ li miegħu jinżel l-ilma ġieri. Dan il-post kompla ssebbaħ ukoll bit-tħawwil ta’ siġar li ħafna nies ħawlu biex jimmarkaw okkażjonijiet speċjali għall-familji tagħhom, bħal twelidijiet u mwiet. Il-Gvern ħawwel ukoll numru kbir minn dawn is-siġar. Waqt li konna hemm xi hadd ikkumenta ‘ħasra li dawn is-siġar jitħawlu żgħar’. Iżda ħaddieħor fehem – ‘dawk ser jikbru mat-tfal tagħna’!

Ħadd minna li konna hemm ma kellu aptit jitlaq dik il-ġenna ta’ l-art biex nerġgħu lura għall-impennji tal-kampanja elettorali.

Għalija li trabbejt Ħal Safi, post imdawwar bil-kampanja u qalb il-bdiewa u r-raħħala, iż-żewġ żjajjar ta’ dalgħodu kienu esperjenza pjaċevoli immens. Bdejt il-ġurnata fil-paċi li ssibha biss fl-ambjent naturali indukrat ….. u servietni matul il-ġurnata kollha.

Tislijiet :)

Kate

L-anzjani f’Malta llum

Il-lum infetħet id-dar ta’ l-anzjani ‘Madonna tal-Mellieħa’. Dar verament sabiħa, ħolqa oħra fil-katina tad-djar għall-anzjani fil-komunità. Mhux ta’ b’xejn li l-anzjani jfittxu li jmorru jgħixu f’dawn id-djar. Apparti l-kenn u l-kumpannija li jsibu, huma jirċievu wkoll servizzi ta’ l-aqwa kwalità.

Xi ngħidu mbagħad għad-Day Centres. Sikwit inkun mistiedna għal xi attivitajiet f’dawn iċ-ċentri. Niltaqà ma’ anzjani kollha b’derha pulita, attivi u ħerqanin jieħdu sehem issa fl-isports, issa fl-arti u l-crafts, fil-kor u riċentement fl-użu tal-kompjuters provduti lilhom fiċ-ċentri. Ma jonqsux ukoll il-kura u t-terapija, kif ukoll is-servizzi spiritwali.

Kemm il-darba żort ukoll l-anzjani f’San Vincenz De Paule. Sena wara l-oħra ninnota kambjamenti għall-aħjar. Minflok blokok ta’ bini qadim telgħu oħrajn ġodda. Is-swali ġew attrezzatti b’sodod u għamara gdida. Sar tisbieħ fuq barra, inħolqot pjazzetta ħelwa u ġiet restawrata l-kapella. Is-servizzi mediċi u ta’ kura, flimkien ma’ servizzi ohra, tjiebu fil-kwalità. Addio l-istigma tal-passat!

F’San Vincenz de Paule, ser jinbena blokk ieħor ġdid fejn ser tingħata t-terapija neċessarja u speċjalizzata lill-anzjani, biex wara li jkun għamlu xi operazzjoni, jirriabilitaw ruħhom u jerġgħu jiksbu l-indipendenza tagħhom. F’ħafna każijiet dawn l-anzjani jirritornaw lura jgħixu f’darhom. Dan is-servizz ser jieħu post dak li kien jingħata fl-Isptar Zammit Clapp.

Il-Gvern, għax jemmen li l-anzjani għandhom jibqgħu igawdu darhom kemm jista’ jkun, joffri servizzi fil-komunità bħal home help, meals on wheels, telecare u nursing kif ukoll tiswija u manteniment tad-djar.

Ftit xhur ilu, l-Gvern nieda l-iskema ‘L-ispiżjar ta’ l-għażla tieghek’. Din digà bdiet titħaddem f’xi lokalitajiet, u l-ħsieb hu li sa l-aħħhar ta’ din is-sena, tinfirex għal lokalitajiet kollha f’Malta u Għawdex. Din l-iskema ntlaqgħet tajjeb ħafna speċjalment mill-anzjani u l-familjari tagħhom. Minbarra li permezz ta’ din l-iskema in-nies ser jiffrankaw il-ħin u l-kjuw, ser ikollhom aktar aċċess għal pariri siewja mingħand l-ispiżjar li ilhom jafu fil-komunità tagħhom.

Għandna nkunu kburin li f’Malta jeżistu servizzi ta’ l-aħjar kwalità biex l-anzjani jghixu hajjithom bl-ahjar mod possibli. Il-gvern issa beda’ jaħdem biex jgħeleb sfida oħra - li jgħin lill-anzjani jibqgħu attivi biex b’hekk jibqgħu jagħtu l-kontribut tagħhom fis-soċjeta.

Tislijiet
Kate :)

Xarabank…O E O !

Il-lejla Lawrence ser ikun fuq il-programm Xarabank fuq TVM. Il-programm ser jibda’ iżjed tard mis-soltu u bla dubju, ser nerġgħu ndumu mqajmin! Matul il-ġimgħat tal-kampanja irqadna dejjem tard. Nittama li meta jgħaddi kollox, jirnexxilna nirkupraw l-irqad li tlifna.

Nhar il-Ħamis 6 ta’ Marzu ser jixxandar mill-PBS l-aħħar dibattitu tal-kampanja bejn iż-żewġ mexxejja tal-partiti ewlenin f’pajjiżna. Bħall-lum u nhar il-Ħamis inkun fuq ix-xwiek u jkolli mitt sena sa ma Lawrence ilesti mill-programm

Forsi xi wħud jaħsbu, li dawn il-programmi huma faċli għal min jieħu sehem fihom, peress li dawn imdorrijin jitkellmu fil-pubbliku u allura jrabbu l-kunfidenza. Pero’ nassigurakom li dan mhux minnu. Kull darba, l-protagonisti jeħtieġ jippreparaw ruħhom sewwa għar-risposti, argumenti u kontenut.

Il-kampanja ta’ dawn iż-żminijiet hi bbażata ħafna fuq il-midja – ġurnali, rivisti, radju, television, websites u billboards

Dan ifisser li l-persuna esposta teħtieġ toqgħod attenta aktar mis-soltu għad-dehra tagħha. Jibdew il-pariri dwar ilbies, qomos, ingravajjet …iżda bla dubju l-attenzjoni primarja tiffoka fuq il-kontenut u l-messaġġ li jrid jitwassal lit-telespettaturi, semmiegħa u qarrejja.

Id-dmir u r-responsabilità tal-ġurnalisti hi li jesponu kemm jista’ jkun l-verità tal-fatti. Dan mhux xogħol faċli. Id-demokrazija titlob skrutinju u kredibilità kemm minn-naħa tal-mexxejja kif ukoll minn-naħa tal-gurnalisti.

Nixtieq nieħu l-opportunità nirringrazzja ’l-ġurnalisti u kull persuna nvoluta fil-midja għal kontribut tagħhom biex jgħaddu informazzjoni korretta u ġusta lis-soċjetà.

Tislijiet
Kate :)

We never had it so good ….

We never had it so good …. esprimiet waħda mill-kelliema dalgħodu meta komplejna niddiskutu s-suġġett tax-xogħol waqt il-progamm Ħin mal-Familja fuq Net TV.

Id-diskussjoni trattat diversi punti mid-dinja tal-impjiegi fosthom kif inbiddlu ċ-ċirkostanzi li fihom qed jiġi ġġenerat ix-xogħol, l-importanza tal-kontribut tal-mara fis-soċjetà u miżuri biex il-familja tibbilanċja aħjar bejn ir-responsabilitajiet differenti.

Ix-xogħol joffri dinjità lill-bniedem. Li nagħtu sehemna lill-ekonomija u lis-soċjetà iġibilna sodisfazzjon, apparti l-finanzi li huma ‘mportanti ħafna għal ħajja ta’ kwalità.

Dan kollu japplika ħafna għan-nisa wkoll. Illum numru ta’ nisa jagħżlu li jaħdmu barra mid-dar.Tradizzjonalment in-nisa kienu jaħdmu mid-dar tagħhom. Illum, minħabba li fl-Universita` hemm aktar studenti xebbiet milli ġuvintur, l-opportunitajiet jehtieg li jkunu miftuħin ukoll għan-nisa.

Li jeżistu l-opportunitajiet ma jiswa xejn sakemm ma jkollniex it-tagħrif u livell edukattiv biex nagħmlu l-aħjar użu minnhom. L-edukazzjoni neċessarja għax-xogħol ma tiġix biss mill-iskola. Il-familja għandha rwol essenzjalli biex trawwem valuri ta’ rispett u responsabilita’ biex uliedhom ikunu kapaċi jaħdmu bħala parti minn team fuq il-post tax-xogħol.

Il-preparazzjoni għad-dinja tax-xogħol qed tieħu ukoll xejra aktar professjonali. Fl-iskejjel tagħna illum insibu persuni professjonisti biex flimkien mal-istudenti jiffukaw fuq l-għażliet li dawn iridu jagħmlu għall-karriera tagħhom. L-informazzjoni tgħin lill-istudenti biex jagħmlu għażliet infurmati u b’hekk ikollhom aktar ‘serħan il-moħħ’ dwar id-dinja tal-impjieg, li fi żmien ftit snin irridu jidħlu
fiha.


L-impenn tan-nisa fil-qasam tax-xogħol qed ikompli jiżdied għaliex illum il-familji għandhom diversi miżuri biex jgħinuhom jistabilixxu bilanċ tajjeb bejn ir-responsabilitajiet tal-familja mar-responsabilità tax-xogħol. Matul l-aħħar xhur, il-Gvern prezenti kompla wessa’ in-numru ta’ inizjattii favur il-familja għall-ħaddiema fis-settur pubbliku. Zdiedu ukoll l-inċentivi finanzjari.

Ma nistax ma nsemmix il-flexi time, reduced hours, beneficcji pro rata u tnaqqis fit-taxxa għal niesa li jerġgħu lura għax-xogħol wara li jkollhom tarbija. Ir-riżultati qed jidru. Matul dawn l-aħħar ftit xhur żdiedu b’il-fuq minn 1,000 in-nisa li jaħdmu.

F’sena nholqu 6,100 impjieg. Jezistu hafna opportunitajiet . Ejjew inkunu ppreparati biex naħtfu dawn l-opportunitajiet.

Tislijiet

Kate :)

Biddilna n-natura tax-xogħol

Il-bieraħ kont preżenti taħt ‘it-tinda’ fil-pjazza tal-Kalkara għal diskussjoni rigward it-tema ‘Xogħol u Investiment’. Ma setax jonqos li fid-diskussjoni jisemma’ Smart City. Fil-fatt konna qrib ħafna tas-sit fejn ser jimbena dan il-proġett kbir.

Il-proġett Smart City jimmarka paġna ġdida fl-istorja ta’ pajjiżna kemm f’dak li hu ammont ta’ xogħol kif ukoll il-kwalità tax-xogħol. Għandna garanzija ta’ aktar xogħol, u xogħol aħjar. Smart City ser tiġġenera ’l fuq minn ħames t’elef impjieg. Ħafna minnhom ser ikunu fil-qasam tat-teknoloġija u l-informatika.

Dan il-proġett ser ikompli jsaħħaħ aspett ġdid li beda jiżviluppa f’pajjiżna - Xogħol ta’ natura differenti. Għamilna qabża mill-qasam tal-manifattura - li ma baqax vijabbli f’pajjiżna - għal diversi oqsma ta’ servizzi, fosthom dawk finanzjarji, tat-teknoloġija u kommunikazzjoni.

Qed isir ukoll ħafna investiment fit-taħriġ biex jipprepara lil dawk li jixtiequ jaħtfu dawn l-opportunitajiet, foshom fl-MCAST u issa fil-proġett Smart Women speċifikament għan-nisa. Permezz tat-taħriġ kull persuna, anki dawk li mhumiex żgħażagħ, qed ikollhom l-opportunita` biex jiżviluppaw il-ħiliet neċessarji biex jidħlu f’din id-dinja ġdida tax-xogħol.

U r-riżultati diġa` qed narawhom. Kumpanniji li sa ftit ilu kienu żgħar, bħal 6PM kibru b’ritmu qawwi, u joffru servizzi mhux biss f’Malta imma anki barra minn xtutna. Infetħu f’pajjiżna diversi call centres ta’ kumpanniji kbar, li ppreferew lill-Malta u ġabu l-operat tagħhom hawn minn pajjiżi oħra Ewropej.

Dan is-settur huwa ta’ importanza partikolari għal Għawdex. It-teknoloġija tgħeleb kull ostaklu fiżiku – ic-cokon t’Għawdex u l-fatt li hu mdawwar bil-baħar ma jtellef xejn. Dan qed jidher fin-numru t’opportunitajiet ġodda li nfetħu f’Għawdex, fosthom il-call centre tal-HSBC u uffiċċju ta’ l-istess 6PM.

Għalkemm matul dawn l-ahhar snin ix-xogħol żdied u nħolqu eluf ta’ impjiegi ġodda, kull sena jilħqu żgħażagħ oħra li jfittxu impjieg. Allura importanti li l-investiment jibqa’ ġej. U dan għaliex ma’ qasam wieħed igawdu qosma oħrajn ukoll. Smart City ser tiġġenera ukoll ħafna xogħol ta’ kostruzzjoni, u ser toħloq ħafna opportunitajiet f’setturi bħal ma huma it-tindif u l-manutenzjoni.

Tassew li l-ġid jiġġenera l-ġid. Nawgura li kull wieħed minna jkompli jagħti l-kontribut tiegħu biex jiġi ġġenerat aktar ġid f’pajjiżna.

Tislijiet,

Kate :)

Meta nagħtu, nirċievu ħafna.

Minn mindu kont żgħira dejjem attendejt xi għaqda volontarja. Kont nattendi l-għaqda tal-M.U.S.E.U.M fejn barra li għallmuna l-katekeżi kienu wkoll sikwit joħorġuna passiġġati u joħduna l-baħar. Peress li dak iż-żmien ħafna familji ma kellhomx karozza, aħna t-tfal konna nistennew dawn il-ħarġiet b’ħafna entużjażmu u ferħ.

Iżjed tard, bdejt immur ic-Ċentru Parrokkjali fejn kont niltaqa’ ma’ ħafna żgħażagħ oħra. Konna nqattgħu siegħat sħaħ hemmhekk, norgannizzaw dibattiti u diskussjonijiet fuq suġġetti varji, sports, discos, reċti u passiġġati. Kien żmien sabiħ fejn igwadanjana ħafna abilitajiet, ħbiberiji, personalità u valuri.

Minn ħmistax-il sena ’l hawn ilni nagħti l-kontribut tiegħi f’żewġ għaqdiet volontarji – Il-Fondazzjoni Richmond u l-Assoċjazzjoni tas-Saħħa Mentali - li joffru servizzi fil-komunità, fil-qasam tas-saħħa mentali.

Nikkonsidra wkoll il-ħin li niddedika fil-kamp tal-politika bħala kontribut volontarju għat-tisħiħ tad-demokrazija f’pajjiżna.

Is-soċjetà Maltija hi sinjura fil-volontorjat – għaqdiet mużikali, kultura, sports, sapport, ambjent, politika u ħafna oħrajn.

Mhux ta’ b’xejn li tant nies apprezzaw meta s-sena li għaddiet ġiet fis-seħħ il-Liġi tal-Volontorjat, liġi li tagħti qafas legali lill-għaqdiet volontarji (mhux governattivi). Il-Liġi tassigura għajnuna lill-għaqdiet, kif ukoll trasparenza u kontabilità.

B’riżultat ta’ l-istess liġi inħatar ukoll Kummissarju għall-Organizazzjonijiet Volontarji. L-għaqdiet huma mħajra jirreġistraw mal-Kummissarju billi jimlew applikazzjoni fuq www.mfss.gov.mt jew fl-uffiċċju tal-Kummissarju Blk C Belt is-Sebħ Floriana.

Din il-liġi u s-somma ta’ kwazi 9 miljun ewro mqassma lil uħud mill-għaqdiet volontarji matul dawn l-aħħar ħames snin, huma turija ta’ fiduċja u apprezzament minn naħa tal-Gvern għax-xogħol siewi li jagħmlu dawn l-għaqdiet fis-soċjeta Maltija.

Jien dejjem emmint fil-valur tal-volontorjat, u nħajjar lil kullħadd jipparteċipa f’xi għaqda volontarja. Meta nagħtu, nirċievu ħafna.

Tislijiet

Kate :)

Ntaffu l-uġieħ …

Xi ħaġa li lili tweġgħani ħafna huwa l-abbuż. Jeżistu diversi tipi t’abbuż. L-aktar li jweġġgħani huwa l-abbuż fuq it-tfal, sew jekk inhu sesswali, fiżiku jew emozzjonali. Abbużi fuq ommijiet u anzjani ukoll isewwduli qalbi.

Xi jġegħelna nweġgħu lit-tfal meta dawn jiddependu fuq il-ħarsien tagħna l-adulti, lin-nisa u l-irġiel li darba konna għażilna bħala l-maħbubin tagħna u lill-anzjani li rabbewna? Forsi l-egoiżmu, is-suppervja, esperjenzi negattivi, kultura u mentalità żbaljata? Kif nistgħu ngħinu biex inwaqqfu l-abbuż?

Fl-2006 il-Parliament għadda il-liġi dwar il-Vjolenza Domestika, li titratta l-abbużi fil-familja. Din il-liġi tipproteġi l-vittmi u tagħti l-possibilità ta’ trattament lil min joħloq l-abbuż. Permess ta’ l-istess liġi ġiet stabbilita il-Kummissjoni għal Vjolenza Domestika biex teduka u toħloq kuxjenza, tiddentifika l-abbuż, issir riċerka, tara li jinħolqu servizzi adekwati, torganizza t-taħriġ ta’ professjonisti li jaħdmu flimkien b’għan wieħed u tagħti pariri lill-Ministru tal-Familja u Solidarjetà Soċjali. Dan huwa żvilupp importanti, iżda xorta baqa ħafna x’nagħmlu. Hemm bżonn li aħna wkoll nagħtu sehemna billi ma nittolleraw l-ebda forma ta’ abbuż, u nitolbu l-għajnuna għal persuni li huma vittmi b’xi mod jew ieħor.

Jeżistu abbużi oħra fis-soċjetà… meta ma ngħatux is-sigħat tax-xogħol li aħna mħallsa għalihom, abbużi ta’ min iħaddem u jisfrutta l-ħaddiema tiegħu, abbużi meta b’qerq nieħdu benefiċċji soċjali mhux mistħoqqa lilna, abbużi fi promozzjonijiet bi ħsara għal ħaddiehor.

Kemm hu sabiħ li nwettqu l-ġid fil-familji u l-kommunità. Ejjew nirrispettaw lil xulxin fil-familja, fuq ix-xogħol, fid-divertiment … kullimkien. Hu possibbli ninbidlu għall-aħjar. Il-weġgħat jistgħu jittaffew jekk infittxu l-għajnuna …u ħajjitna tkun aħjar.

Tislijiet,

Kate :)

Il-valur veru … li tkun qrib in-nies

Il-bieraħ fil-għaxija attendejt attività tas-Soċjeta tal-Multiple Sclerosis ta’ Malta. Din l-attività ma kellha x’taqsam xejn mal-kampanja elettorali, li bħalissa qeda fl-aqwa tagħha u li qed timlielna kull mument ta’ ħajjitna. Iddeċidejt li nattendi din iċ-ċena, li ġiet organizzat biex is-soċjetà tiġbor il-flus, sabiex nuri l-appoġġ tiegħi għax-xogħol siewi li tagħmel din l-għaqda mhux governattiva. Il-flus miġbura jintużaw biex jingħataw servizzi lill-membri li jbgħatu min din il-kundizzjoni.

Il-Multiple Sclerosis taffetwa is-sistema ċentrali tan-nervaturi tal-ġisem li tirriżulta f’diffikultajiet ta’ vista, kordinament u mobilità. Dawk il-persuni li jbgħatu minn din il-kundizzjoni jistgħu jesperjenzaw għejja, ħafna uġieħ u diffikultà biex jitkellmu. Fost l-aktar servizzi mportanti li toffri is-Soċjetà tal-Multiple Sclerosis hemm il-fiżjoterapija għall-persuni affettwati u l-psikoterapija għall-familji tagaħhom.

L-attività, li saret f’waħda mill-isbaħ lukandi li hawn f’Malta, kellha attendenza tajba. Ħadt ħafna gost niltaqa’ ma’ ħafna minn dawk preżenti. Qgħadt nisma’ id-diffikultajiet li l-MS tikkawża lilhom, lill-familjari u l-carers tagħhom, speċjalment meta tkun fi stadju avvanzat.

Hemmhekk għaraft il-valur tal-politika, ‘l bogħod mit-tixjir tal-bnadar, fil-ħajja personali tal-individwi u l-familji li qed jgħixu bl-isfida ta’ din is-sitwazzjoni li tikkundizzjonalhom ħajjithom.

Hemmhekk tifhem aħjar kemm hu mportanti li pajjiżna jiġġenera il-ġid biex inkunu nistgħu nipprovdu servizzi ta’ saħħa ta’ kwalità, għajnuna adekwata għal-persuni skond il-ħtiġijiet tagħhom, u għall-għaqdiet volontarji li jipprovdulhom l-appoġġ.

Qabel ma tlaqt offrewli warda sabiħa b’ringrazzjament għall-attendenza tiegħi. Xtqat kieku nrodd il-warda lura lill-presidenta tal-għaqda ghax xoghol siewi li twettaq. Grazzi

Tislijiet
Kate :)

Opportunitajiet għall-Istudenti

Għadni kif ġejt lura minn Għawdex. Gżira verament pittoreska speċjalment bħalissa bil-ħdura fil-kampanja. Iltqajna ma’ ħafna Għawdxin kuntenti li l-investiment reġa’ rkupra u t-turiżmu ħa spinta ’l fuq. Grazzi dejjem għall-impenn tal-Gvern u tas-soċjetà ċivili f’Għawdex. Grazzi ukoll għall-finanzi mill-Unjoni Ewropea li permezz tagħhom flimkien mat-taxxi tagħna tlesta t-terminal ta’ l-Imġarr u t-Triq mill-Imġarr għal San Lawrenz.

L-Għawdxin huma bieżla u għandhom ħafna abilitajiet. Jippromovu b’entużjażmu l-kultura tagħhom u diġa qed iħaddnu l-proposta ġdida fil-manifest elettorali ’Eko Għawdex’.

Il-bieraħ fil-għaxija iltqajna maż-żgħażagħ Għawdxin taħt it-tinda. Id-diskussjoni tagħhom trattat punti varji. L-aċċenn kien fuq l-opportunitajiet fl-edukazzjoni. Iż-żgħażagħ tkellmu dwar ir-riformi u l-investimenti kbar mill-livell bażiku taċ-child care centres u l-kinder sa l-għola livell terzjarju. Semmew l-10 kulleġġi li nħalqu f’Malta u Għawdex biex jgħaqqdu flimkien l-iskejjel primarji u sekondarji ta’ l-Istat, ħalli jgħinu t-tfal tagħna jgħixu esperjenza edukattiva sħiħa u kontinwa mill-kinder għall-primarja u għas-sekondarja, bl-inqas skossi possibbli.

Intqal ukoll li numru tal-istudenti li qed ikomplu jistudjaw f’istituzzjonijiet post-sekondarji u terzjarji qed jiżdied kull sena. Għandhom għażla ta’ istituzzjonijiet.... il-Junior College, l-Higher Secondary, l-MCAST, l-ITS kif ukoll l-Università. L-MCAST, li hu rikonoxxut bħala Ċentru ta’ eċċellenza mill-istituzzjoni ewlenija tal-kwalifiki l-Edexcel żviluppa b’rata tassew mgħaġġla. Illum jinkludi disa’ istituti u jilqa’ fih aktar minn 10,000 student li jattendu l-korsijiet offruti. Mhux ta’ b’xejn ġew investiti kważi 23 miljun lira Maltin f’din l-istutuzzjoni! L-għan hu li l-ammont ta’ l-istudenti jirdoppja.

Iktar min 15,000 student qed jircievu stipendji li jlaħħqu mat-Lm8.2m fis-sena. L-istudenti Għawdxin, li għandhom spejjeż partikolari għalihom stqarrew apprezzament għaż-żieda fl-istipendji tagħhom.

Dawk preżenti iddiskutew it-twaqqif tal-Kummissjoni għall-Edukazzjoni Ogħla, li ser tipprovdi pariri lill-Gvern dwar ippjanar aħjar biex ikompli jissaħħaħ u jikber is-settur post-sekondarju u terzjarju f’pajjiżna.

Mhux ta’ b’xejn, li ħafna żagħżagħ ser jagħmlu għażla favur il-kontinwità ta’ dawn l-opportunitajiet fl-edukazzjoni ... sabiex jirnexxu lkoll!

Tislijiet

Kate :)

Investiment fl-iskejjel u kulleġġi

Illum attendejt għall-inawgurazzjoni ta’ l-iskola Primarja tas-Siġġiewi li kważi nbniet mill-ġdid. F’din l-iskola nbiddlu s-soqfa, saret estensjoni ta’ sular, inbniet sala ġdida u ġew zviluppati numru ta’ faċilitajiet ġodda għall-isport.

Din hija waħda minn 138 skola li ġew modernizzati f’Malta u Għawdex matul dawn l-aħħar ħames snin. In-numru huwa kbir meta jiġi ikkunsidrat iċ-ċokon ta’ pajjiżna. Fost ix-xogħolijiet li saru f’dawn l-iskejjel hemm inkluż laboratorji, swali, faċilitajiet sportivi u rikreattivi, klassijiet speċjalizzati, lifts u tant interventi oħra biex it-tfal ikollhom l-aqwa faċilitajiet aċċessibli għall-istudenti kollha. L-ambjent nadif, pulit u sabiħ jgħin biex it-tfal ikunu izjed kuntenti u allura jitgħallmu aktar.

Apparti l-immodernizzar tal-183 skola, tlestew żewġ kulleġġi ġodda - dak ta’ San Benedittu u dak ta’ Sant’Injazju (magħruf bħala Tal-Ħandaq). Skejjel ġodda, li tlestew f’ żmien qasir, b’faċilitajiet li jvarjaw, inkluż laboratorji, klassijiet, faċilitajiet sportivi u rikreattivi, klassijiet speċjalizzati għat-tagħlim tad-drama, mużika, arti u ċeramika, studji ambjentali, tisjir, guidance, klinika kif ukoll il-kappella w l-librerija. Mhux ta’ bxejn li kien hemm student li irrefera għall- kulleġġ bħala ’l-isbaħ skola tad-dinja!’

Ix-xogħol fuq il-kulleġġ tal-Verdala miexi b’ritmu tajjeb. Beda x-xogħol ukoll fuq skola ġdida f’Pembroke u hemm ippjanat skola oħra fil-Mosta. Anke Għawdex messu sehem minn dan l-investiment. Qed tinbena skola ġdida fir-Rabat li ser tindirizza l-bżonnijiet ta’ l-istudenti f’soċjeta moderna.

Apparti l-investiment fl-infrastruttura, qed isir ukoll investiment daqstant ieħor importanti f’tagħmir tat-teknoloġija. Ser jingħataw kompjuters ġodda lill-iskejjel kollha biex ikun hemm komputer għal kull 4 studenti u laptop għal kull għalliem/a.

Sar ukoll investiment kbir fit-taħriġ tal-għalliema. Lilhom nafdaw it-tfal tagħna li tant huma għeżież għalina u li għalihom irridu biss l-aħjar.

Hemm il-ħsieb li jitwettaq programm ta’ attivitajiet wara l-ħin ta’ l-iskola. Dawn l-attivitajiet jieħdu sehem fihom kemm l-istudenti kif ukoll il-bqija tal-komunta’. L-iskejjel tagħna qed nibdluhom f’Centri tal-Kommunità biex kulħadd ikun jista’ jgawdi minn dawn ir-riżorsi essenzjali biex nibqgħu nimxu ‘l quddiem.

Tislijiet

Kate :)

Saħħitna priorità

Nisimgħu u naqraw ħafna dwar is-saħħa fil-midja. Qegħdin ukoll insiru dejjem iżjed konxji ta’ kif nieħdu ħsieb saħħitna kemm mil-lat fiżiku kif ukoll mentali. Il-kwalità ta’ servizzi fis-saħħa u l-kwalità ta’ ħajja aħjar jgħinu biex jipprevenu ħafna mard u biex ngħixu iżjed fit-tul. Minkejja dan kollu, xorta kultant ngħaddu minn perijodi ta’ mard li jeħtieġ kura ġo l-isptar.

Ftit xhur ilu, infetaħ il-Mater Dei, sptar ġdid li joffri l-aqwa f’dak li huwa servizz tas-saħħa. L-isptar ta’ qabel inbena fis-seklu l-ieħor u m’għadux addattat għas-servizzi tal-lum. Il-lum il-pazjent għandu aktar kumdità u privatezza.

Il-faċilitajiet żdiedu u llum jilħqu l-għola livelli ta’ kwalità stabbiliti internazzjonalment. Mhux faċli tibni sptar ġdid attrezzat bl-iktar faċilitajiet u apparat modern. Lanqas mhu faċli li iċċaqlaq pazjenti u staff minn sptar għal ieħor. Għadna fil-fażi ta’ tranżizzjoni. Kull min xi darba biddel id-dar jaf li dejjem iddum ftit biex toqgħod u tidra, u hekk hu l-każ f’ Mater Dei. Għadna kif iċċaqlaqna, u għad hemm xi rfinaturi li għad iridu jsiru, pero' ħafna jaqblu li għamilna pass kbir ‘l quddiem.

L-ambjent huwa ċentrali għall-fejqan; f’ambjent isbaħ tħossok tfiq aktar malajr. Sintendi s-servizz mediku huwa essenzjali wkoll għall-fejqan. Malta dan l-aħħar ġiet meqjusa fil-ħames post tal-pajjiżi li jagħtu l-aqwa servizz tas-saħħa fid-dinja. Dan jagħmlilna unur, iżda ma jserħillniex moħħna li kollox huwa sew. Irridu nibqghu naħdmu biex is-servizz li jingħata f’Mater Dei ikun ‘state of the art’ bħal ma hu l-isptar.

Għandna ukoll qabżiet oħra ppjanati fis-servizzi tas-saħħa. L-ispeċjalizazzjoni fis-servizzi għal kura tal-kanċer ser tgħaddi minn l-iSptar Boffa għal Zammit Clapp, filwaqt li ser tibena sezzjoni ta’ rijabilitazzjoni fi ħdan ir-residenza SVPR.

Jikkumplimenta dan kollu hemm ukoll il-pjanijiet għal riformi fil-qasam tal-kura primarja fil-kommunità li ser tibda tiffoka aktar fuq il-preservazzjoni tas-saħħa, apparti li tgħin fil-fejqan.

Nawguralkom ħafna saħħa biex tgawdu l-ġid li hawn madwarna.

Tislijiet

Kate :)

Ma Nsejtkomx!

Qed niprova nirrispondi ftit e-mails imma l-qattus qed jittanta jimxili fuq il-laptop. Iħobb jindieħes ħafna magħna. Kultant meta nkun qed nikteb, għandu ħabta joqgħod warajja fuq is-siġġu u bil-kemm iħallili wisa’ fejn inpoġġi bil-qiegħda. Drabi oħra joqgħod jilgħab mal-wire tat-telefon li nkun qed nuża. Irid l-attenzjoni huwa wkoll. Nammetti li dan l-aħħar ma tantx kelli ħin infissdu. ‘Ma nsejtikx’, għidtlu, ‘ara x’nagħmel, inwegħdek li nsemmik fil-blog li jmiss, mhux lilek biss imma anke lill-annimali sħabek’.

L-annimali jiddependu fuq il-ħarsien u l-imħabba tagħna. Hawn ħafna nies li jirrispettaw l-annimali u xi wħud, mhux talli biss jieħdu ħsieb l-pets tagħhom, imma saħansitra wkoll, min flushom jixtru ikel u bżonnijiet oħra għal annimali abbandunati. Essenzjalment, aħna poplu li jħobb ’l annimali. Madanakollu, sfortunatament għad hawn persuni li jittrattaw l-annimali ħazin. Fil-fatt jeħtieġ li nkomplu nrawmu kultura ta’ rispett lejn l-annimali.

Ħadt pjaċir dan l-aħħar meta qrajt bil-ftehim li biħ il-Gvern għadda r-responsabilità ta’ biċċa art fil-Mellieħa lil Noah’s Ark li hija waħda mill-organizazzjonijiet volontarji u non governattivi (NGOs) li jaħdmu fil-qasam tal-ħarsien ta’ l-annimali. Din il-miżura se tkompli ssaħħah ix-xogħol li diġa qed isir favur il-ħarsien tal-annimali fosthom l-allokazzjoni ta’ 350,000 Ewro (Lm150,000) għal dan is-settur fil-bidu tas-sena u l-ftehim biex jiġi żviluppat After Care Animal Centre f’Ta’ Qali.

Parti minn din l-allokazzjoni [€175,000 (Lm75,000)] se jintużaw biex flimkien mal-NGOs jinbeda programm nazzjonali għan-neutering tal-qtates u l-klieb waqt li l-kumplament tal-flus ser jintużaw għal titjib ta’ faċilitajiet ta’ dawn l-NGOs.

Dawn l-inizjattivi huma nkorraġġanti ħafna u jagħtu indikazzjoni ċara tal-impenn li hawn lejn dan is-settur. Il-proposti elettorali għal dan il-qasam ikomplu iserħulna rasna għax jaħsbu biex lanqas l-annimali ma jibqgħu lura. Ser isiru arranġamenti biex ħaddiema tal-gvern jiġu trasferiti biex jaħdmu fis-santwarji tal-annimali, biex ikun hemm ir-riżorsi meħtieġa biex l-annimali jiġu ndukrati kif jixirqilhom. Il-proposta tal-micro chipping fejn ta’ ċipp tal-kompjuter jkollha d-dettalji kollha tal-kelb, is-sidien jinżammu responsabbli. Ser jinfetaħ ukoll ċentru għar-rijabilitazzjoni tal-annimali tal-baħar.

M’ghandix dubju li permezz ta’ dawn il-miżuri ser jittaffa l-piż minn fuq l-NGOs u fl-istess ħin aktar annimali jsibu l-imħabba li tixirqilhom!

Tislijiet

Kate :)

Smart Women

Il-bieraħ attendejt għall-inawgurazzjoni tal-programm Smart Women iffinanzjat mill-Ministeru għall-Investiment , Industrija u Teknologija flimkien mal-Microsoft Corporation, bl-appoġġ ukoll tal-Kunsill Nazzjonali tan-Nisa. Dan il-programm Smart Women ser joffri taħrig fl-użu tal-komputer (ITC) li jkopri mill-livell bażiku sa livell avvanzat u Ii jwassal għal ċertifikati mill-Microsoft rikonoxxuti internazzjonalment. Dan it-taħrig ser ikun mingħajr ħlas. Waqt dawn il-korsijiet ser jiġi provdut servizz ta’ ħarsien għat-tfal żgħar. Applikazzjonijiet jintlaqgħu sal-28 ta’ Marzu mill-Maltapost jew mill-website http://www.thesmartisland.gov.mt/ .

It-teknoloġija tal-informatika (ITC) saret parti essenzjali mid-dinja tax-xogħol. Il-kompjuter sab postu tista’ tgħid f’kull settur - f’uffiċini, f’negozju, fil-fabriki. Dan l-iżvilupp li issa’ ilu għaddej għal diversi snin f’pajjiżna qed joħloq ħafna postijiet tax-xogħol. L-investiment qed joħloq domanda għal ħaddiema mħarrġa fl-ITC. Hu essenzjali, li aħna n-nisa nitħarrġu fl-ITC sabiex naħtfu dawn l-opportunitajiet tax-xogħol.

Il-programm Smart City hu intiz ukoll għan-nisa li jibqgħu d-dar għaliex l-użu tal-kompjuter jgħinhom jikkomunikaw mal-familjari u ħbieb tagħhom, jiffaċilita ħajjithom meta jiġu biex iħallsu kontijiet u jordnaw ix-xirja on line, jgħinhom fl-għajnuna li jagħtu lit-tfal waqt l-istudju tagħhom u jiprovdilhom minjiera ta’ informazzjoni.

Smart City hija ħolqa waħda minn katina ta’ skemi offruti mill-Gvern biex jitkompli tixterred it-teknoloġija f’pajjizna - sussidji għax-xiri ta’ kompjuters ġodda, servizz ta’ Broadband internet għall €3 fix-xahar, u kompjuters rikondizzjonati li jinbiegħu bi prezzijiet sussidjati għal familji żvantaggati.

Xi snin ilu, jien ukoll ħassejt il-bżonn li nitgħallem nuża l-kompjuter sabiex nikommunika mat-tifel li kien qed jistudja barra minn Malta. Issa nista ngħid li drajt mhux ħazin u kuljum nużah fix-xoghol tiegħi mid-dar.

Ninkoraġixxi lin-nisa jisfruttaw din l-opportunita` permezz tal-programm Smart Women.

Tislijiet

Kate :)

353 Proposta Ġdida

Il-bieraħ il-Partit Nazzjonalista laqqa’ l-Kunsill Ġenerali tiegħu biex approva l-programm elettorali għall-Elezzjoni Ġenerali tat-8 ta’ Marzu. F’dan il-programm elettorali nsibu 353 proposta ġdida mifruxin fuq diversi oqsma li jinkludu l-ekonomija, x-xogħol, l-edukazzjoni, is-saħħa, l-ambjent, il-qasam soċjali u Għawdex. Dawn il-proposti jistgħu jinqraw fuq il-ġurnali kif ukoll fuq www.lawrencegonzi.info.

Issa dak li qed jipproponi li jagħmlu l-partiti kollha, jekk ikunu fil-gvern, huwa magħruf.

Jeħtieġ li nixtarru sewwa kull programm elettorali għaliex huwa l-mappa li partit jipproponi li jsegwi fil-ħidma tiegħu matul il-ħames snin li ġejjin fit-tmexxija tal-pajjiż.
Allura nistaqsu – liema programm ser ikompli jibni fuq dak li mbeda digà mad-dħul ta’ pajjiżna fl-Ewropa? Liema joffri benefiċċji ġodda għall-familji? Liema qed jiggarantixxi ħajja ta’ kwalità aħjar? .

Għalhekk huwa ‘mportanti li kull wieħed u waħda minna nistudjaw tajjeb il-programmi li ġew preżentati, niżnu u nqabblu dak li qed jiġi propost. Fit-8 ta’ Marżu għandna nagħmlu għażla infurmata għall-ġid ta’ pajjiżna.

-

Illum mort it-tieni Mass Meeting. Kienet ħafna kesħa, u mmaġinajt li n-nies ser jaqtgħu qalbhom u joqgħodu d-dar għall-irdoss. Imma l-politika tbaqbaq f’demm il-Maltin. Nieħduha bis-serjetà. Irridu nisimgħu u nkunu nformati dwar dak li ser nivvutaw għaliħ.

X’emozzjoni meta tara dak il-baħar ta’ nies quddiemek … Xena li tfakkarni fir-responsabilità kbira li jidħol għaliha min imexxi l-gvern. Jiena ċerta li ser nagħżlu lil dawk il-persuni li huma l-aktar addattati biex jerfgħu din ir-reponsabilita f’pajjiżna!

Tisliet

Kate :)

Toħroġ kandidat … reponsabilità, vokazzjoni u impenn.

Nhar l-erbgħa 13 ta’ Frar għalqu l-applikazzjonijiet għall-kandidatura ta’ l-elezzjoni ta’ Marzu 2008. B’kollox ser jieħdu sehem 260 kandidat.

Mhux faċli għall-mexxejja tal-partiti li jikkonvinċu persuni integri u bil-ħiliet neċessarji biex jiddedikaw ruħhom fil-kamp politiku. Ħafna drabi, persuni b’dawn il-kwalitajiet isibuha diffiċli jidħlu għal dan l-impenn għaliex il-politika tinvolvi ħafna sagrifiċċji, xogħol u ħin; tesponi lill-kandidati u lill-familji tagħhom għal skrutinju pubbliku; u tirrikjedi kompetizzjoni ma’ kandidati oħrajn.

Meta fl-1986, Lawrence ġie mitlub joħroġ bħala kandidat tal-Partit Nazzjonalista, hu dam jaħsibha ħafna jekk kellux jidħol għal dik ir-risponsabiltà. Beda jittama li jkun hemm ħaddieħor li jidħol għal dan l-impenn minfloku. Iżda prinċipji li kien jemmen fihom u li dak iż-żmien kienu mhedda, tawħ raġuni tajba biżżejjed biex jikkunsidra li jagħti sehemu bis-serjetà. Kienet sejħa u obbligu li ma setax jaħrab minnhom.

Meta s-sena l-oħra, konna Berlin għaċ-ċelebrazzjonijiet tal-50 anniversarju tat-Trattat ta’ Ruma, ħassejtni kommossa ħafna meta rajt il-fdalijiet tal-ħajt ta’ Berlin. Ħajt, li għal kwazi nofs seklu, kien simbolu ta’ diviżjoni f’l-Ewropa. U issa, 50 sena wara, l-istess Berlin laqgħet fiha kapijiet minn 27 pajjiż Ewropew, flimkien komessi għat-tħaddin ta` prinċipji ta’ demokrazija, paċi u solidarjetà. X’differenza pożittiva! Din hi id-differenza li politiċi integri kapaċi jġibu fl-Istorja! Kuntrarju għal dak li jaħsbu ħafna nies, il-politika hija vokazzjoni nobbli! X’sodisfazzjon għall-kandidati li bl-‘iva’ tagħhom jgħinu biex isseħħu bidliet għall-aħjar fl-istorja ta’ l-umanità!

Tislijiet

Kate :)

Għażiża Celine ….

L-aħbar tal-mewt tiegħek smajt biha b’kumbinazzjoni, l-bieraħ, fuq ir-radju.

Ħassejt vojt u dieqa f’qalbi għaliex int, mingħajr ma taf, kont sirt esperjenza f’ħajti. It-telefonati tiegħek, fejn ħafna drabi qsamt miegħi il-beżgħat u t-toqol tal-mard tiegħek kienu skola ta’ għerf għalija. Minkejja li l-mard tiegħek kien fit-tul u diffiċli, il-manjieri u l-kliem tiegħek baqgħu dejjem ħelwin. Meta kultant kont tħossok xi ftit aħjar, kont iċċempilli, ferħana, u nidħqu b’xi ċajta wkoll. Sirna ħbieb allavolja rari ltqajna.

X’ħin smajt il-ħin li kellha ssir il-quddiesa tal-funeral tiegħek, mal-ewwel irrealiżżajt li ser ikun impossibbli għalija li nattendi għax kelli attivita` oħra fl-istess ħin. Xtaqt ħafna li nkun viċin tiegħek għall-aħħar darba.

B’xi mod irnexxieli niġi ċ-ċimiterju għal ftit ħin; ma stajtx ma nsellimlekx. Issa nħossni aħjar għax naf li inti issa qed tistrieħ.

Grazzi Celine…

Tislijiet

Kate :)

Ta’ xulxin jew għal xulxin?

“Ta’ xulxin għal dejjem” - espressjoni ta’ mħabba li spiss nisimgħuha b’referenza għal relazzjonijiet. Magħha norbtu wkoll espressjonijiet simili – ‘ir-raġel tiegħi’, jew ‘it-tfajla tiegħi’. Donnu hemm xi ftit l-idea ta’ pussess, u għalhekk ma nafx jekk nifhmux sew is-sinifikat ta’ din l-espressjoni.

Forsi naħsbu li l-persuni li mingħalina nħobbu issa saru tagħna, u allura nipposseduhom u nipretendu li joqgħodu għal dak li jidhrilna aħna? Forsi, għaliex “ta’ xulxin”, nimponu l-ideat u d-deċiżjonijiet tagħna fuq dawk li nħobbu? Forsi nagħlqu ’l xulxin f’kaxxa, minħabba l-biżgħat tagħna?

Jew li nħobbu ifisser li ngħixu “għal xulxin”? Li naħdmu għall-ġid ta’ xulxin, li nkabbru l-potenzjal ta’ xulxin u li ninkoraġġixxu l-espressjoni tal-kelma u l-ħsieb?

L-imħabba titlob fiduċja fil-persuni li nħobbu. Hi għotja għal xulxin f’kull ma ngħamlu, kuljum. Darba kien hemm omm li qaltli, li biex l-ikel jiġi itjeb, tinkludi kejl ta’ mħhabba mal-ingredjenti.

Għada Jum San Valentino. Ġurnata sabiħa għal min jixtieq jesprimi mħabbtu iżjed mis-soltu. U għala le? Xejn xejn fid-dinja mgħaġġla tal-lum, niefqu ftit biex napprezzaw lin-nies li aħna mdawrin bihom, napprezzaw kemm huma ‘mportanti għalina u aħna għalihom, u kemm l-imħabba għal xulxin tagħmel differenza f’ħajjitna.

Għalkemm it-tradizzjoni ta’ San Valentinu oriġinarjament kienet marbuta mal-maħbubin, reċentement din twessgħet, u f’xi pajjiżi bħall-Finlandja illum titqies bħala ġurnata tal-ħbieb. U xi ngħidu għal-nies oħra li nħobbu? Ulied, ġenituri u oħrajn?

* * *
Insomma... bħal kull sena, illum qabel norqod għad irrid nikteb nota t’aprezzament lil Lawrence u npoġġijielu fil-bagalja tax-xogħol biex isibha għada f’Jum San Valentino. Is-soltu, wara li jaqraha, nirċievi telefonata mingħandu. Ħa naraw din is-sena, nirċevijiex!

Tislijiet

Kate :)

Skart Prezzjuż

Żort xi skejjel primarji u kont impressjonata kemm it-tfal qegħdin isiru konxji tal-ambjent. It-tfal bdew ifhemuni fuq suġġetti ambjentali bħal separazzjoni ta’ l-iskart, riċiklaġġ, konservazzjoni ta’ l-ilma u l-impatt tat-tibdil fil-klima. Dawn it-tfal qegħdin jipparteċipaw fil-Programm EkoSkola, programm li jħeġġeġ lit-tfal jieħdu sehem attiv favur l-ambjent fl-iskola, fid-dar u fil-komunita`.

Sirt naf li hemm madwar 72 skola madwar Malta u Għawdex jieħdu sehem f’dan il-programm. Is-sehem tagħhom favur l-ambjent qed jinfluenza anke lill-kbar. It-tfal qed jgħallmu lill-ġenituri jibżgħu għall-ambjent. Tant hu hekk li kien hemm omm preżenti li qaltli ‘it-tifla tiegħi kontinwament għassa miegħi tara xi tfajt fid-dustbin!’ Għedt bejni u bejn ruħi ‘tajjeb..u jien dejjem indur ġol-kmamar tagħna għassa x’tefgħu biż-żball ġo d-dustbins. Daqqa nsib xi container tax-shampoo, xi flixkun zgħir tal-fwieħa, xi kaxxa tal-kartun.”

Jien ukoll konxja li għandi nissepara l-iskart. Fil-kċina għandi basktijiet għall-karti, plastik, ħġieġ u metall, u fil-ġnien għandi rokna fejn nagħmel il-kompost minn fdalijiet tal-ħaxix. L-iskart isseparat nieħdu fil-bring in sites li għandna f’Wied il-Għajn, bħal ma hemm f’diversi lokalitajiet madwar Malta. Jeżistu il-fuq minn 200 bring in sites madwar Malta u Għawdex u 200 oħra fl-iskejjel.

L-iskart li jinġabar mill-bring-in-sites jitwassal fl-impjant tar-riċiklaġġ ta’ Sant’ Antnin. Hemmhekk, tipi differenti ta’ l-istess materjal jiġu separati minn xulxin ( plastik trasparenti minn plastik kulurit etc). Kull tip ta’skart, ħlief il-ħġieġ, jinbiegħ biex jiġi riċiklat. Il-karta ukoll tinbiegħ lokalment biex tintuża għat-trobbija tal-annimali. Evidenza li l-iskart huwa riżorsa.

Interressanti wkoll li anki l-fdalijiet tal-ikel għandu valur. Il-gass li joħroġ mill-iskart organiku, fil-proċess biex jiġi mibdul f’kompost, ser jintuża biex tiġi ġġenerata l-enerġija elettrika. Huwa maħsub li b’hekk ser jiġi prodott l-ekwivalenti tal-konsum ta’ 1,400 familja ta’ erba’ persuni! Dik energija alternattiva! Dak skart prezzjuż!

Ir-riforma tal-ġbir ta’ l-iskart li ser tibda fl-aħħar ta’Marzu li ġej ser tkompli tgħinna nagħmlu użu aħjar minn dan ir-risorż ġdid li skoprejna. Ser jintbagħtu f’kull dar, boroż speċjali għas-separazzjoni ta’ l-iskart, li jiġu miġbura minn wara l-bieb tad-djar darba fil-ġimgħa. Issa żgur m’hux ser ikollna skużi! L-iskart hu prezzjuż, għalhekk jaqbel li nirriċiklawħ.


Tislijiet

Kate :)

Jimpurtana ... Ma Tlaqniex !

Fi tmiem il-ġimgħa li għaddiet infetaħ għall-pubbliku l-impjant tar-riċiklaġġ ta’ Sant’ Antnin. Kif tafu, dan qiegħed biss ftit passi l-bogħod minn fejn noqogħdu aħna f’Marsascala. Dan il-proġett għal snin twal ħoloq polemiki, taħdidiet, ilmenti u opinjonijiet bejn residenti, għaqdiet u entitajiet. Sa ħargu diċeriji li aħna tlaqna mid-dar u morna noqogħdu x’imkien ieħor biex naħarbu l-iskomdu tal-impjant. Fejn ma qalux li morna noqogħdu? ...Hal-Qormi, tas-Sliema; saħansitra, anki fil-Parlament kien hemm min iddikjara li aħna xtrajna art fin-Naxxar biex immorru ngħixu l-bogħod mir- riċiklaġġ. Aħna ma tlaqniex!

Jiena nifhem il-preokupazzjoni tar-residenti u l-ġirien tagħna. Meta smajt li l-impjant ser jiġi modernizzat, jiena wkoll fittixt informazzjoni biex inkun naf x’tibdil kien ser isir u x’impatt jista’ jħalli fuq l-ambjent u r-residenti. Skoprejt kif ser taħdem din it-teknoloġija ġdida għall-immaniġġjar tal-iskart. Ħafna min-nies li ġew iżuru l-impjant kienu sorpriżi b’din it-tekonoloġija. Xi ħaġa ferm differenti mill-miżbla li xi wħud ħasbu li kien. Matul dawn jumejn il-pubbliku apprezza l-ewwel fażi tal-impjant li bdiet topera riċentement. Din ser titratta 36,000 tunnellata ta’ skart reċiklabbli kull sena, fosthom dak mill-bring-in-sites li għandna fil-lokaliajiet different. Parti oħra se titratta 35,000 tunellata ta’ skart organiku li jiġi ġġenerat mid-djar. Dan ifisser li b’kollox is-sit ser jitratta 71,000 tunnellata ta’ skart fis-sena!

Nifhem li meta persuna tisma’ dawn in-numri tista’ tallarma ruħha, speċjalment jekk tgħix fl-akwati tal-impjant bħali. Pero, meta naf, li l-impjant ser ikun qed jitħaddem fuq regoli ambjentali retti tal-Unjoni Ewropea, bħal impjanti simili li jitħaddmu f’pajjiżi oħra, jiena nserraħ moħħi.

Meta, fuq it-televiżjoni nsegwi l-problema enormi tal-iskart fit-toroq ta’ Napli, napprezza, bil-kbir, l-importanza tal-impjant tar- riċiklaġġ!

Tislijiet

Kate :)

Kemm, jekk jogħġbok?

Dalgħodu mxejna matul is-suq fir-Rabat, Malta. Minkejja li s-sema sebħet imsaħħba u raxxet xi ftit xita ukoll, kien hemm numru konsiderevoli ta’ nies jixtru. Suq hu dejjem popolari għax għażla kemm trid - ħwejjeġ, affarijiet għad-dar, oġġetti antiki, diski, kotba, ikel, ħaxix u frott.

Tkellimt ma’ xi nisa anzjani u staqsejthom jekk drawx jixtru bl-Ewro. Waħda bi tbissima weġbitni li drat u m’għandhiex diffikultà. Pjuttost, kważi qaltli "Xi ħsibt? Li minix kapaċi jien ukoll?". Innotajt persuni jħallsu bl-Ewro qishom ilhom jużawha għomorhom u mhux xahar biss. Kultant tara lil xi ħadd jgħodd il-bqija, darba, darbtejn u jgħaddi xi kumment ukoll. Imma huwa normali li wieħed jagħmel hekk. Wara kollox, persuna dejjem trid toqgħod attenta x’qed tonfoq!

Nammetti, li din il-bidla xi ftit affettwat lili wkoll. Fl-ewwel ġimgħa kont inħabbel naqra moħħi u nikkalkula l-prezzijiet mill-Ewro għall-Maltin biex nara kemm qed inħallas. Mal-ħajt fil-kċina dendilt lista ta’ xi prezzijiet bl-Ewro ta’ oġġetti li nixtri minn wara l-bieb - bħal ċilindru tal-gas jew ħobża Maltija.

Kont naħseb li l-aktar li ser idumu biex jidraw il-munita l-ġdida huma l-anzjani. Imma minn dak li qaluli dalgħodu jidher li ħafna minnhom diġa' draw. Dawk li għadhom isibuha xi ftit diffiċli dejjem isibu l-għajnuna ta’ xerrejja oħra jew mingħand il-bejjiegħa stess, għax jagħrfu kemm hu importanti li jibżgħu għall-klijenti tagħhom.

Ħafna Maltin għarfu l-importanza tal-munita Ewro u għenu biex jiffaċilitaw il-bidla. Id-“dual display” għal kull oġġett, jiġifieri li turi ż-żewġ prezzijiet – flus Maltin u Ewro, sewa ħafna għax b’hekk ingħata ż-żmien biex aħna nifhmu aħjar il-valur u nidraw il-bidla tal-munita f’pajjiżna.


Tislijiet

Kate :)

Rikonoxximent…

Jien niġi f’kuntatt ma ħafna nies u bħalissa aktar minn żminijiet oħra. Dalgħodu kont qed nitkellem ma’ omm ta’ żewġt itfal. Staqsietni nispjegalha x’inhi din il-proposta li ommijiet li jaħdmu barra mid-dar jibdew jiffrankaw sena taxxa għal kull wild li jkollhom.

Biex il-pajjiż jibqa’ sejjer ’l quddiem jeħtieġ aktar nies jagħtu l-kontribut fid-dinja tax-xogħol. F’Malta ħafna rġiel jaħdmu. Għandna inqas nisa minn irġiel jaħdmu barra mid-dar, u dan, għaliex fil-kultura tagħna, ir-responsabilità tad-dar u tal-familja, għadha primarjament f’idejn l-ommijiet.

L-inizjattiva li omm li taħdem barra mid-dar tiġi eżentata milli tħallas taxxa fuq il-paga għal sena għal kull wild li jkollha tirrikonoxxi l-kontribut kbir li n-nisa jistgħu jagħtu fl-ekonomija u fis-soċjetà, flimkien mal-kontribut li jagħtu lejn il-familja. Din l-inizjattiva għandha tgħin lil-irġiel jagħrfu l-potenzjal tal-mara u b’hekk, jinkoraġġuha tipparteċipa fid-dinja tax-xogħol, waqt li huma jagħrfu ukoll li jeħtieg jagħtu kontribut akbar fil-familja. Dan ifisser li l-ġenituri t-tnejn jeħtieġ li jieħdu responsabilità tal-familja flimkien max-xogħol li jkollhom barra mid-dar.

Tgħid din l-inizjattiva ser tħajjar aktar nisa’ biex jagħtu l-kontribut tagħhom fid-dinja tax-xogħol? Tgħid twassal għal bilanċ aħjar ta’ kif ir-responsabilitajiet tal-familja jinqasmu bejn in-nisa u l-irġiel?

Li tiffranka sena taxxa għal kull tifel jew tifla, ifisser li familji b’ġenituri li jaħdmu it-tnejn, u li jagħzlu li jkollhom aktar tfal, ser iħallsu inqas taxxi. Din il-miżura twassal ukoll għal aktar ġustizzja. Min għandu aktar tfal għandu aktar spejjeż, u allura din l-opportunità tindirizza din id-differenza.

Il-progress li għamel dan il-pajjiż qed ikompli jirrendi l-ġid lill-familji tagħna, u dan b’mod li jixhed sens ta’ ġustizzja soċjali. Aħna wkoll nistgħu nagħmlu l-parti tagħna biex dan il-pajjiż ikompli jimxi ’l quddiem.

Tislijiet

Kate :)

Pawlu ta’ Malta

Il-bieraħ kelli l-pjaċir napprezza wieħed mill-isbaħ xogħolijiet kulturali li jaf joffri t-talent Malti. L-Oratorju Pawlu ta’ Malta, mill-pinna ta’ Mro Charles Camilleri fuq lirika ta’ Prof Oliver Friggieri reġa’ ttella’ fil-Knisja ta’ Santa Tereża Birkirkara. Il-kant tas-solisti u tal-kor ikkumplimentat mill-orkestra flimkien ħolqu simfonija ta’ mużika, letteratura, reliġjon u kultura li fiha jispikka kemm aħna poplu bi tradizzjoni rikka u varjata.

L-attendenza sabiħa li, minkejja il-maltemp, attendiet għal dan ix-xogħol mużikali turi biċ-ċar kemm il-poplu Malti sar jaf japprezza dak li aħna stess kapaċi noffru. Dan l-Oratorju huwa biċċa xogħol oħra f’katina ta’ diversi rapreżentazzjonijiet kulturali.

Matul l-2007 il-poplu Malti kellu l-opportunità li jgawdi numru rekord ta’ kunċerti, opri u festivals fost oħrajn. Ħafna minn dawn ittelgħu f’postijiet storiċi li ħolqu atmosfera ferm addattata. Il-kunċert ta’ tenur Malti ġewwa l-Imdina, bil-Katidral fl-isfond, kien fost l-aqwa. Dar il-Mediterran għal-Konferenzi, it-Teatru Manoel, it-Teatru l-Imwaqqà, il-Konkatidral ta’ San Ġwann, il-Ġgantija f’Għawdex u Kastilja kienu wħud mis-siti prestiġjużi f’pajjiżna li fihom stajna nitpaxxew b’tant sbuħija.

Mhux ta’ min jinsa l-kunċert ta’ mużika kontemporanja popolari fil-Valletta Waterfront li ġibed udjenza kemmxejn differenti, u l-kunċert li sar mill-MTV fuq il-Fosos tal-Furjana. Kunċert internazzjonali li ġibed ħafna Maltin u turisti, filwaqt li wassal lill-pajjiżna fid-djar madwar id-dinja permezz tat-televiżjoni.

L-Oratorju Pawlu ta’ Malta huwa eżempju ċar tad-drawwa ġdida fejn entitajiet kbar, fosthom banek ewlenin, qed jiffinanzjaw attivitajiet bħal dawn biex b’hekk jagħtu lura lill-komunità ftit minn dak li jkunu qalgħu mill-istess komunità.

Matul dawn l-aħħar snin, l-apprezzament ta’ dak kollu li hu kulturali f’pajjiżna ħa spinta ’l quddiem. L-impenn tal-Gvern, l-interess tas-settur privat kif ukoll tagħna lkoll huwa kruċjali biex dan jibqa’ jseħħ.

Tislijiet

Kate :)

Sea Plane

Din il-ġimgħa kelli diversi attivitajiet ġewwa Għawdex. Il-Ħadd li għadda attendejt għaċ-ċeremonja tat-tqegħid ta’ l-ewwel ġebla tal-kulleġġ li bħalissa qed jinbena fir-Rabat.

Illum mort inżur it-Taqsima Speċjalizzata fl-Iskola Primarja tas-Sannat fejn saret Multi Sensory Area sponsorjata mill-HSBC Cares For Children Fund – proġett b’faċilitajiet li jgħinu lit-tfal jitgħallmu skond il-ħtiġijiet individwali tagħhom.

Peress li bħalissa mħabbta ħafna iżjed mis-soltu, iddeċidejt li nuża is-Sea Plane. Kelli kurżita` nara kif jaħdem dan is-Sea Plane u nammetti, kont ftit eċitata sa ma rkibt fuqu. Nassigurakom…esperjenza meraviljuża…li tirkeb ajruplan fuq l-ilma u fi ftit minuti issib ruħek fl-ajru. Mezz ta’ trasport li mhux komuni – attrazzjoni u kumdità.

Fi ftit minuti wasalna Għawdex mill-Belt Valletta. Apparti l-ħin li ffrankajt, kienet mawra sabiħa għax rajt is-sbuħija tal-Port il-Kbir, tal-kampanja fil-gżejjjer tagħna u l-baħar blu tal-madwar. Stajt nifhem kemm dan il-mezz ta’ trasport hu ta’ attrazzjoni għat-turisti li jiġu jzuruna. Mezz alternattiv biex igawdu s-sbuħija ta’ pajjiżna filwaqt li jivvjaġġaw komdi u f’iqsar żmien.

Għal Għawdex, bħala l-iżgħar gżira, il-mezzi ta’ trasport huma essenzjali. Fil-ħajja tal-lum, it-trasport effiċjenti huwa bżonn – kulħadd qed jgħix ħajja mgħaġġla. In-nies fil-business, li jitilgħu Għawdex fuq-xogħol - il-ħin tagħhom jissarraf fi flus; It-turisti jippreferu jivjaġġaw f’inqas ħin.

Permezz ta’ inizjattiva privata pajjiżna qed igawdi minn servizz ieħor ta’ trasport bejn il-gżejjer tagħna. Nirrealiżża x’impatt jista’ jagħmel l-investiment privat f’pajjiżna.

Tislijiet

Kate :)

Familja jew Xogħol?

Illum kont f’ħanut qed nistenna fil-kju biex inħallas ix-xirja. Bdejt inpaċpaċ ma’ mara li kellha tifla zgħira magħha u ġie l-kliem li hi kienet in-nanna tat-tifla u li kienet qed tieħu ħsiebha waqt li l-ġenituri kienu x-xogħol. Qaltli li ħasra li kieku wara tant sagrifiċċji u studju, missierha u ommha ma jkomplux bil-karriera tagħhom.

Din il-kwistjoni tal-bilanċ bejn il-familja u x-xogħol hija bla dubju realta’ għal ħafna familji u ġenituri. Kif issib bilanċ m’hijiex faċli u naħseb li kullħadd jirrealizza li mhux in-nanniet kollha jistgħu jipprovdu dan l-appoġġ. Ħafna ġenituri jixtiequ li jkollhom xi persuna li jistgħu jafdaw biex teħdilhom ħsieb lit-tfal żgħar tagħhom.

Ħadt gost pero illi din il-mara qaltli hi stess li hemm xi opportunitajiet tajbin għal meta la hi, u lanqas il-ġenituri, ma jkunu jistgħu jieħdu ħsieb lit-tifla. Fil-fatt dan l-aħħar snin rajna ħafna żviluppi tajbin. Infetħu ċentri għat-tfal matul il-jum (child-care centres), kemm ta’ l-istat kif ukoll privati, li huma rregolati minn set ta’ standards maħrugin mill-Gvern biex jaċċertaw li, kemm dawk il-persuni li jieħdu ħsieb lit-tfal, kif ukoll il-post, huma addattati għal din il-funzjoni. Per eżempju ċ-ċentri tal-Gvern Smart Kids fil-Birgu u B’kara tgħidx kemm huma mfittxijin mill-ġenituri. Fil-jiem li ġejjin ser jinfetaħ ċentru tat-tfal f’Ħal-Luqa u għaddej ix-xogħol fuq ċentri oħrajn f’Raħal Ġdid, il-Għargħur u l-Qawra.

Illum ġenituri li jħallsu l-miżata biex jibagħtu ‘l uliedhom fiċ-ċentru ta’ matul il-jum, issa, jistgħu jiffrankaw parti mit-taxxa. Hemm ukoll l-appoġġ li jingħata lill-ġenituri bħal ma huwa l-parental leave, il-career breaks, ir-reduced hours u l-flessibilta` fuq ix-xogħol.

Kemm hu sabiħ li filwaqt li tagħti lit-tfal l-attenzjoni meħtieġa jkun hemm l-għażla u l-opportunitajiet biex il-ġenituri jibqgħu jimxu fil-karriera tagħhom. Għax fl-aħħar mill-aħħar dan kollu jistgħu jerġgħu jagħtuh lura lit-tfal.

Tislijiet

Kate :)

Raw Malta mill-Ajru

Dan l’aħħar, mort inżur id-dar-K.I.D.S fiż-Żejtun fejn it-tfal ħawwlu xi siġar. Veru ħadt gost għaliex is-siġar inħobbhom ħafna. Is-siġar ifissru ħajja u arja nadifa. L-hena tiegħi nħares lejn il-weraq ħodor ileqqu speċjalment wara x-xita.

Milux, iltqajt ma’ emigranti Maltin mill-Awstralja, li ġew iżuru lill qraba tagħhom f’Malta. M’hix l-ewwel darba li ġew. Il-mara ikkummentatli li din id-darba, waqt li kien nieżel l-ajruplan fuq Malta, innotat li kienu żdiedu s-siġar fil-pajjiż. Spjegatilha li f’dan l-aħħar sentejn tħawwlu 43,000 sigra. l-mira għal din is-sena 2008, hi li jitħawwlu 30,000 siġra oħra.

Il-kampanja “3 4 U” qed tirnexxi. Ħafna individwi, entitajiet privati u organiżazzjonijiet volontarji qed jipparteċipaw fil-kampanja ta’ tħawwil tas-siġar, addottawha u għamluha tagħhom. Ħafna nies xtraw siġar biex jitħawwlu f’postijiet publiċi. Bla dubju, qed tinħoloq kultura ġdida favur l-afforestazzjoni. Il-ħolma tiegħi hi li Malta titħaddar izjed, ikollha aktar siġar u tisbiħ. Nixtieq li l-Maltin ikollhom iżjed wesgħat bis-siġar biex igawdu s-serħan u arja nadifa tant meħtieġa f’din il-gżira żgħira, b’popolazzjoni hekk kbira.

Tislijiet

Kate :)

X'Jimpurtani?!

8 ta’ Marzu 2008 - Data ta’ l-elezzjoni f’Malta.

Kampanja oħra! Xogħol, taħbit u ġiri! Laqgħat, żjarat, attivitajiet u dibattiti galore! Eċitament u tħassib. Tensjoni ?..xi ftit ukoll. Responsabilta? ..ħafna.

Għaliex elezzjoni? Biex nagħzlu lil min nixtiequ li jmmexxina fil-ħames snin li ġejjin. Mexxejja b’direzzjoni li jgħinuna nkabbru l-kwalita’ tal-ħajja tagħna ta’ kuljum, fl-oqsma tal-ekonomija, saħħa, edukazzjoni, xogħol u ambjent; fuq kollox - mexxejja li jrawwmu valuri ta’paċi u stabilita’ fil-familji tagħna u fil-pajjiż. Mexxejja li għax jemmnu fil-kapaċitajiet tagħna għandhom fiduċja fina u jinkoraġġuna nilqgħu l-isfidi taż-żminijiet.
Jimpurtani? Iva jimpurtani u għalhekk dejjem nivvota f’kull elezzjoni. L-vot hu għodda f’idejja, biex ngħażel jien, lil min nemmen li jista’ joffri l-aħjar garanzija ta’ gid għalija u għal uliedi. Hemm min jgħid, x’jimpurtani, ma nivvutax. Allura ngħid jien, dawn jixtiequ jħallu lil ħaddiehor jivvota għalihom?

Jien irrid inkun ċerta li l-vot tiegħi jagħmel differenza għall-aħjar. Iva, bil-vot tal-ġenituri tiegħi, Malta kisbet l- Indipendenza tagħha. Iva, bil-vot tiegħi meta kont żagħżugħa, inkisbu d-demokrazija u l-paċi fil-pajjiż .Iva, tlett snin ilu bil-vot tiegħi, Malta daħlet fl-Unjoni Europea. Issa, iva, bil-vot tiegħi fit-8 ta’ Marzu ser nistinkaw sabiex il-vot tagħna ikompli jiggarantixxi t-tisħiħ ta’ ekonomija soda, solidarjeta` soċjali u ambjent san.

Tislijiet

Kate :)